A actividade, organizada pola asociación Espazo Lectura, será o martes 7 de xuño na Biblioteca de Gondomar

A novela Peaxes, de Santiago Lopo (Xerais, 2009), é a proposta coa que Espazo Lectura pecha a tempada do Club de Lectura Sete Vidas, que retomará a súa actividade tras as vacacións de verán. A cita será o martes 7 de xuño, a partir das 20.00 horas, na Biblioteca Municipal de Gondomar. A xuntanza contará coa presenza do autor.

Tras unha primeira parte durante a cal as persoas que se acheguen á biblioteca poderán compartir as súas impresións arredor da novela Peaxes, o seu autor, Santiago Lopo, achegarase á biblioteca para conversar cos lectores e lectoras da novela.

O libro

Desde a súa ventá ao mundo, un caixeiro de peaxe da autoestrada bota unha ollada ás fraccións de vidas que se cruzan con el acotío. Esas instantáneas compoñen unha colaxe que lle axuda a fuxir da soidade. A partir destes encontros fugaces, ceiba a súa imaxinación e crea un universo ao ritmo da música que sae dos nosos vehículos cando baixamos a xanela para pagar, un planeta movido por anacos de conversas que desaparecen a cen quilómetros por hora. Desde a cabina, o narrador obsérvanos, temeroso de mergullarse na nosa rutina, mais contento de que rompamos a súa. Os usuarios da autoestrada erixímonos en protagonistas dun relato áxil que acelera nas curvas perigosas. En Peaxes conflúen todas as Galicias existentes e as imaxinadas, demostrando que realidade e ficción comparten a miúdo o noso destino. Unha novela breve que fará gozar a lectores e lectoras.

O autor

Santiago Lopo (Vigo, 1974) é profesor de francés na Escola Oficial de Idiomas de Pontevedra. Iniciouse profesionalmente traducindo guións cinematográficos en inglés para televisión, e en 1998 co traduciu ao galego, xunto a Xavier Queipo, dúas obras do escritor francés Hervé Guibert (Citomegalovirus e O meu criado e mais eu), publicadas por Xerais. Desde o ano 2000 colabora coa revista Unión Libre, onde publicou diversos artigos e traducións. En 2006 gañou o VI Premio de Novela por Entregas La Voz de Galicia, coa novela Game Over. Peaxes é a súa segunda novela.