O mar da fin do mundo, documental científico galego sobre os cefalópodos das costas de Galicia vén de facerse co primeiro premio do Ciclo Internacional de Cine Submarino de San Sebastián CIMASUB 2011. O reino dos cefalópodos, que contou coa colaboración da Xunta de Galicia, a través da Secretaría Xeral de Política Lingüística, acadou o galardón na categoría de traballos de máis de 25 minutos. Producido por José Irisarri, dirixido por Manuel Uhía e coa participación de Manuel E. García como cámara e documentalista, o documental, que constitúe unha completa produción audiovisual sobre a vida dos cefalópodos nas rías galegas, foi distribuído o pasado mes de marzo en todos os centros educativos de Galicia, co fin de achegarlles aos alumnos e alumnas contidos curriculares propios das ciencias naturais en galego.

Segundo a da Secretaría Xeral de Política Lingüística , deste xeito, a colaboración co proxecto responde ao interese deste departamento por dotar os centros de materiais de calidade que lles permitan aos docentes traballar en galego en distintas áreas, co fin de facilitar o seu labor educativo e mais de mostrar a utilidade da nosa lingua en calquera campo do saber.

Coa colaboración dun dos maiores expertos do mundo en cefalópodos

O documental, coproducido por Marevisión e Gestión y Tratamiento de Imagen del Atlántico, contou co asesoramento científico de Ángel Guerra, do Instituto de Investigacións Mariñas de Vigo, e de Roger T. Hanlon, do Marine Biological Laboratory, un dos maiores expertos en cefalópodos do mundo.

O Ciclo Internacional de Cine Submarino de San Sebastián clausurou na fin de semana a súa trixésimo quinta edición.