A catedrática da Universidade de Vigo e veciña do Val Miñor, Camiño Noia, participará na XVIII edición de Ponte...nas ondas! o próximo venres 1 de xullo.
Camiño Noia visitou o Instituto gondomareño de Terra de Turonio, para impartir unha conferencia sobre o conto popular.
A profesora da Universidade de Vigo, Camiño Noia participará na XVIII edición de Ponte...nas ondas! que ten como lema PONTE...A CONTAR! e que está centrada na difusión do conto popular de tradición oral.
Camiño Noia, autora de dúas importantes obras relacionadas co conto popular: Contos galegos de tradición oral ( 2002 ) e Catálogo tipolóxico do conto galego de tradición oral ( 2010 ) participou recentemente co alumnado do IES Terra de Turonio no programa de radio que realizan dende o centro.
XVIII de Ponte nas Ondas!
O tema desta edición xira arredor do conto popular. Os centros educativos realizaron traballos audiovisuais sobre esta temática. Os contos populares forman parte do noso patrimonio inmaterial e deben ser transmitidos e conservados como parte dun valioso “tesouro” que ten na lingua o seu principal soporte. Especialistas no conto tradicional de transmisión oral como a profesora da Universidade de Vigo Camiño Noia ou o profesor da Universidade de Trás Os Montes Alexandre Parafita ou o investigador e escritor Antonio Reigosa, intervirán na programación para dar a coñecer cal é a importancia que teñen os contos populares.
Esta nova edición contará coa participación de centros educativos de Galicia e Portugal e tamén de outros países como Cuba, Chile, Colombia ou Brasil.
O conto como asunto
O conto popular será o fío condutor da programación achegada polos centros educativos que mostrarán diversas actividades realizadas polo alumnado: recollas de contos a portadores, experiencias de relatos de portadores nas aulas, dramatización de contos, creación de banda deseñada a partir de contos, narrativas dixitais ( Storytelling ), etc.
Programas especiais
Ponte...nas ondas! emitirá nesta edición a X Mostra da Oralidade Galego-Portuguesa: CONTAMOS NO MUNDO que se realizou o pasado 25 de maio no Museo do Verbum de Vigo e na que participou alumnado de centros educativos galegos e portugueses, narradores orais e investigadores de Galícia, Portugal e Brasil.
No edición tamén se emitirá unha reportaxe das XII Jornadas Internacionais do conto da Universidade do Minho en Braga na que participaron narradores orais de todo o mundo.
A emisión a través de Internet estará a cargo de UVIGO-TV da Universidade de Vigo. A programación comezará ás 10.00hs. da mañá (hora galega) e poderá ser visionada en formato de vídeo e audio á carta.
Máis información en www.pontenasondas.org
