Este venres unha ruta organizada polo Instituto de Estudos Miñoranos permitirá percorrer a vila de Gondomar recreando o seu pasado dende o Antigo Réxime ata o século XIX. O arquitecto Antonio Soliño Troncoso será o encargado da guía que sen deixar de ollar o entramado urbano da vila condal da segunda metade do XIX e primeira metade do XX, centrarase naqueles testemuños inda vivos que a conformaron séculos atrás.
O percorrido, dentro das clásicas Xeiras do IEM, terá lugar o vindeiro venres 22 de agosto baixo o título: "Xeira: Gondomar no Antigo Réxime. A vila ata o século XIX". O punto de encontro será ás 17:30 horas na Aula de Cultura Ponte de Rosas, sede do IEM, na Avda. da Feira Nº10, baixo – Gondomar. A actividade é gratuíta e non require inscrición previa.
Preme aquí para descargar o folleto informativo da Xeira.
