A asociación pola defensa medioambiental da Serra da Groba reuniuse o sábado 3 de novembro cos veciños e veciñas de Barrantes no pavillón de deportes. A comunidade de montes desta parroquia tomiñesa opúxose á instalación dos aeroxeradores dende que se fixo público o proxecto de Eurovento presentando varias alegacións.

 

Os asistentes seguiron con moito interese a presentación do presidente da asociación, Xosé Lois Vilar Pedreira, quen, co apoio dunha presentación fotográfica, subliñou o grave impacto ambiental que suporía a construción das infrastruturas necesarias á instalación do parque eólico.

 

Destacando a riqueza do patrimonio cultural co que conta Barrantes, SOS A Serra da Groba informou das numerosas axudas autonómicas e europeas ás que podería optar esta comunidade de montes incluída no PRODER do Baixo Miño. 

 

O aproveitamento e a musealización do patrimonio coma fonte dun turismo desestacionalizado son unha das alternativas ao parque eólico que ofrece a asociación pola defensa medioambiental da Serra da Groba a todas as comunidades afectadas.