O pasado martes á tardiña, SOS A Serra da Groba estivo na Galería Sargadelos de Vigo convidada pola Fundación Enclave, unha fundación de interese galega sen ánimo de lucro que tenta ser un foro aberto, de pensamento, debate e formación, onde contribuír ao desenvolvemento pleno das potencialidades do país mediante o artellamento da sociedade civil e a súa participación plural e democrática.

Logo de expoñer as principais características do parque Albariño I e de informar das xestións e actividades realizadas polos membros de SOS Groba dende a súa creación o pasado mes de agosto, a charla completouse cunha recollida de sinaturas e cun debate en torno ao potencial eólico da nosa comunidade e á xestión deste tipo de enerxía eólica que está a levar a administración.