Escoitar
este artigo

A Plataforma pro-Seleccions Esportives Catalanes ofrece unha aplicación que lle engade a este xogo de computador o combinado galego, catalán, vasco e andorrano. Vieiros fixo algo semellante hai un ano. Tamén hai equipo das segundas divisións catalás (Gimnastic e Taragona) e vascas (Real Sociedad, Eibar e Alavés), así coma o Girona, o Terrassa, o Sabadell, o Gavà, o Lleida, o Gramenet, o Badalona, L'Hospitalet e o Espanyol B, de 2ª B; e o Castelldefels Reus, o Santo Andreu ou o Barcelona B, de terceira división. Estes, engadidos ás seleccións nacionais vasca, catalá, galega e andorrana, fan un xogo ben completo, no que se pode escoller o equipo co que un máis se identifique. Esta aplicación pode descargarse na páxina da Plataforma pro-Seleccions Esportives Catalanes, de balde (fai falta rexistrarse), e tamén inclúe os informes actualizados de cada equipo, as convocatorias dos partidos, as últimas fichaxes actualizadas, publicidades de empresas catalás no terreo de xogo e faixas, axeitadas para os partidos da selección catalá (incluíndo a de Una Nació, una Selecció, que é a propia da Plataforma). A selección chegaba en 2006 aos videoxogos da man de Vieiros En 2006 creábase un parche para o Pro Evolution Soccer no que se incluía a selección nacional. Naquela altura Galiza ía xogar contra ecuador, e, por iniciativa de Gael García, todos os afeccionados con este xogo no seu PC podían baixar, de balde, a aplicación e galeguizar as partidas co máis destacado daquela partido de 2006: as pancartas dos seareiros galegos, a camisola oficial, a convocatoria de Vázquez e Arsenio... todo ía incluído no parche. Como guinda tamén viña a opción de xogar cunha selección galega clásica, cos nosos mellores futbolistas da historia elixidos, naquela altura, polos lectores de Vieiros. Velaquí algún dos vídeos da primeira selección galega virtual O comezo do encontro, o 3-0 virtual a Ecuador e o partido do combinado dos mellores xogadores da historia do fútbol galego, xogando (e gañando!) contra A Canarinha.

---

Compartir esta noticia: