Escoitar
este artigo

Anxo Pintos, un dos membros desta formación que naceu no ano 1995, explica que o último traballo do grupo foi Hepta, publicado no ano 2001. Na actualidade a formación prepara un novo disco: «Faltan por gravar catro temas pero supoño que para o nadal non estaría aí­nda; agardamos que saia na primavera do ano que vén», indica Pintos.

Pero a gran novidade deste novo traballo discográfico de Berrogüetto é que «estamos gravando con enerxía solar no parte natural das illas Cíes, na casa dos gardas forestais».

A base do novo cedé desta formación, que recibiu o Premio da Crítica alemana en 1997 polo seu primeiro disco, Navicularia , é «a música que fixemos hai uns anos para a serie documental Renovart , que ía sobre enerxías alternativas e emitiuse en Canal Plus», lembra Anxo Pintos.

Apunta o compoñente de Berrogüetto que este é un traballo moi especial que xurdiu cando a productora do programa e os membros do grupo «vimos que a música da serie tiña entidade propia por si sola». De tódolos xeitos, este é un cambio de rumbo nos discos anteriores de Berrogüetto, como Viaxe por Urticaria ou Hepta , xa que esta vez «máis que unha mensaxe musical concreta trátase de facer unha música máis atmosférica, un son para a creación dun climax».

Vídeo

O novo disco desta formación musical, para o que aínda non hai título, «terá trece ou catorce temas», indica Pintos. O cedé irá acompañado dun DVD no que se recollerá todo o proceso de gravación, «a plasmación desta idea que servirá, entre outras cousas, para amosar a riqueza do Parque Natural das Illas Atlánticas e a importancia que teñen para Galicia as enerxías alternativas», argumenta Pintos. Nesta línea, o portavoz de Berrogüetto pensa que este novo disco pode servir para descubrir e impulsar estas enerxías limpas, das que defende o seu uso no eido doméstico, «aínda que o certo é que as instalacións son moi caras e as subvencións da Comunidade Europea, non se sabe moi ben por que, nin se coñecen».

Fuente www.lavozdegalicia.es

---

Compartir esta noticia: