Como xa é tradicional o Instituto de Estudos Miñoranos organiza todos os veráns, este é o cuarto ano consecutivo, unha serie de visitas-guiadas ou xeiras a distintos lugares de especial interese histórico, artístico, natural e paisaxístico do Val Miñor.

Trátase de pequenos percorridos a realizar polas tardes dirixidos por especialistas no tema da visita. O programa está pechado e conta coa colaboración das concellerías de cultura de Gondomar e Baiona.

O próximo mércores 13 de xullo será a primeira das visitas-guíadas ou xeiras organizadas polo Instituto de Estudos Miñoranos. A visita será ao conxunto de petroglifos do Monte Tetón, na estrema das parroquias de Couso (Gondomar) e Tebra (Tomiño).

Trátase dunha das superficies prehistóricas gravadas máis impresionantes que coñecemos no continente europeo. Nuns douscentos metros cadrados gravados destaca unha concentración de circos, na parte alta da rocha, que acada os dous metros e medio de diámetro, acompañada por coviñas en fileiras. Outras enmarcadas por motivos cadrangulares, varios antropomorfos, unha escena de monta e varios motivos únicos coma un corniforme ou unha rosácea, que lembra os arghinas románicos ou castrexos, ou incluso uns rebaixes da rocha que lembran muíños naviculares de soporte fixo.

Xunto co conxunto de Auga da Laxe (Vincios) e Outeiro dos Lameiros (Sabarís) conforman o extraordinario triángulo da arte rupestre no Val Miñor.

A paraxe completase cun castro, mámoas e unhas excelentes vistas sobre o Miño e Portugal, a serra do Argalo, a Madanela e a Groba.

A visita comezará ás 18 horas (seis da tarde) e o punto de encontro será a Casa do Concello de Gondomar. Esta xeira estará guiada polo arqueólogo Xosé Lois Vilar Pedreira, director da Sección de Prehistoria do Instituto de Estudos Miñoranos e pola tamén arqueóloga Rosa Villar Quinteiro, redactora do proxecto de Ecoparque arqueolóxico do Monte Tetón.

AS XEIRAS Verán 2005 DO IEM

Todas as saídas ás 18 h.

*As saídas indicadas, especialmente a da serra do Galiñeiro, teñen unha certa dificultade física.

Organiza:IEM

Colabora: Cultura Gondomar e Cultura Baiona.