O concello de Nigrán levanta por sorpresa o empedrado en Panxón e os ánimos dos comerciantes.
A piques de comezar o verán as rúas Arco Visigótico e Álvaro Mourelle desde o paseo marítimo ata a rúa Tomás Mirambel serán obxecto de obras de substitución do pavimento empedrado.
Veciños e comerciantes de Panxón amosan a súa preocupación e malestar polos atrancos que as intervencións están a causar na zona en vísperas da tempada turística. Os traballos comezaron esta semana e o prazo de execución previsto é de dous meses.
Fernández Comesaña, voceiro da UCN manifesta o seu apoio ás protestas dos afectados e cuestiona a “urxencia e necesidade” de comezalas nestes intres.
O edil afirma que os veciños e comerciantes víronse sorprendidos polo comezo das obras o pasado luns, das que non tiñan aviso previo. Afirma que o goberno local non só ignorou aos afectados da zona, “senón tamén, á mesma asociación de veciños Monteferro de Panxón, que nin atende as súas peticións nin informa de actuacións relevantes na parroquia”.
O goberno quere reinstalar as laxes levantadas na Ramallosa no centro de Panxón.
As obras están valoradas en 50.391,73 euros, a financiar integramente pola Deputación. Fernández insiste en que as mesmas “non son urxentes nin necesarias”, que máis ben son produto da “improvisación e do despilfarro”, xa que as rúas foron empedradas a principios dos anos 90 e “mantéñense en perfecto estado de conservación”.
Segundo o edil o goberno pretende substituírllas polas aquelas laxes de pedra retiradas nas rúas da Ramallosa, “porque se rompían e levantaban ao paso de vehículos. O que non valía para A Ramallosa, parece que agora serve para Panxón”, agrega.
UCN igualmente cuestiona que as obras a realizar conten coa correspondente autorización de Patrimonio, xa que se atopan no ámbito do propio Arco Visigótico e do castro da Madorra, bens protexidos e catalogados pola Xunta de Galicia.
Fernández esixe a inmediata paralización das obras.
Fernández Comesaña, esixe ao alcalde Alberto Valverde, a inmediata paralización das obras. Entende que as mesmas pódense aprazar perfectamente ata o mes de setembro. Por outra banda pide ao rexedor Alberto Valverde que informe aos veciños e comerciantes afectados, si contan con todos “os permisos regulamentarios, as características do proxecto, así como a conveniencia e necesidade de substituír unhas pedras por outras, talvez peores, o que demostra despilfarro, falta de ideas e incapacidade dun alcalde, que cada vez está máis afastado dos cidadáns”.
