O Xornal do Val Miñor. Baiona, Nigrán, Gondomar

O Concello de Mondoñedo co patrocinio da Área de Cultura da Deputación Provincial de Lugo, convoca o XII Premio de poesía Díaz Jácome para novos creadores. Co fin de estimular a creación poética entre os mozos e mozas de ata 30 anos, organizan este concurso que outorgará aos gañadores premios de ata 1.500€. O prazo de admisión de orixinais remata o día 1 de xullo do ano 2011. O certame fai unha homenaxe ao poeta e xornalista  Xosé Antón Díaz Jácome, nado en Os Muíños (Mondoñedo), o 19 de abril de 1910, integrante da Xeración Literaria do 36. A súa primeira obra foi Primeiras cantigas do amor publicada en 1936, cun epílogo de Álvaro Cunqueiro e con ilustracións de Bernardino Vidarte. E en 1983, a Editorial Galaxia, na colección «Dombate», publica o derradeiro libro de poemas en galego titulado Muíño fidel. Xosé Díaz Jácome é un dos poetas que sae no volume cuarto de Escolma de poesía galega, obra feita por Francisco Fernández del Riego, publicado no ano 1955. Faleceu o 6 de setembro de 1998.

O Instituto Galego da Calidade Alimentaria (Ingacal) abre un proceso de actualización e inclusión de novo persoal naquelas categorías profesionais necesarias para o funcionamento do Instituto. O prazo de presentación de solicitudes estará aberto ata o 13 de maio de 2011.

Máis información no DOG do 13 de abril de 2011

Segue aberta a convocatoria para a selección de doce prazas de auxiliar de policía local no Concello de Nigrán. As prazas ten o carácter de persoal laboral temporal, por un período de dous meses e están dotadas coas retribucións contidas no orzamento municipal vixente no actual exercicio. A selección se realiza polo procedemento de oposición libre.

A Secretaría Xeral de Modernización e Innovación Tecnolóxica abre unha convocatoria de axudas para que empresas e asociacións empresariais de calquera sector económico e as específicas do sector  das Tecnoloxías da Información e a Comunicación (TIC) presenten proxectos de carácter tecnolóxico en réxime de cooperación. Así se recolle nunha resolución que se publica hoxe no Diario Oficial de Galicia. A concesión destas axudas contan co financiamento do 80% Fondo de Desenvolvemento Rexional FEDER, realizarase en réxime de concorrencia competitiva.

Dende hoxe, veciños e turistas poderán participar de dúas rutas guiadas pola Vila Real de Baiona. Unha delas dará a volta á fortaleza de Monterreal polo seu perímetro interior. Durante o percorrido un equipo de guías estudante do Obradoiro Erguesía de Baiona,  explicará o contexto histórico, arquitectónico e paisaxístico deste importante enclave medieval. A segunda das rutas parte do Parque da Palma, pasando polo paseo marítimo, o museo da Carabela la Pinta, a Lonxa de pescadores e o Casco Vello de Baiona, para finalizar cunha visita ás igrexas ex Colexiata e Santa Liberata. Os itinerarios realizaranse ata o domingo 24 de abril. O horario de saída será de mañá ás 11:30 h e pola tarde ás 18:00 h . As rutas terán como punto de partida e de chegada a oficina de Turismo, situada a carón da entrada á fortaleza de Monterreal. Os interesados poden realizar a correspondente inscrición e acadar mais información na citada oficina.

A programación de teatro no Auditorio Municipal Lois Tobío de Gondomar correspondente ao primeiro semestre do ano finalizará no mes de maio coas actuacións de Cándido Pazó e Malasombra no relativo a obras para adultos, e Ghazafelhos e Caramuxo Teatro en canto a teatro infantil.

O luns, martes e mércores, ás 19:30, na ex colexiata de Santa María celebrarase o Triduo ao Santo Cristo. O Xoves Santo ás 16:00 horas celebrarase na capela do convento das Madres Dominicanas a misa da institución da Eucaristía. Dúas horas despois (18:00 horas), unha nova eucaristía esta vez na ex colexiata. Ás 20:30 da capela da Misericordia sairá a procesión dos Pasos, organizada pola Santa Casa de Paz e Misericordia. Seguidamente Miserere na ex colexiata e na Praza do Concello actuación do Coro de Homes "Voces Baionesas". Este mesmo xoves, a partir das 23:00 horas, dará comezo a vixilia e a adoración nocturna.

Mañá mércores ás 19:30h na Aula de Cultura "Ponte de Rosas" (Avda. da Feira 10, baixo) sede do Instituto de Estudos Miñoranos inaugurarase a exposición Xesús Valverde (1925/1993). Nesta exposición retrospectiva, celebrada 18 anos despois da morte de Xesús Valverde, ademais de amosar esculturas en pequeno e mediano formato, exporanse 26 debuxos, a meirande parte inéditos, algúns deles realizados nos últimos anos da súa vida que reflicten a súa interpretación simbólica do río Miñor e da paisaxe miñorá. A exposición estará aberta ata o 26 de maio e poderá ser visitada de luns a venres de 19 a 22 horas.